اردوئے معلیٰ

Search

یہاں بھی تو وہاں بھی تو زمیں تیری فلک تیرا

کہیں ہم نے پتا پایا نہ ہر گز آج تک تیرا

 

صفات و ذات میں یکتا ہے تو اے واحدِ مطلق

نہ کوئی تیرا ثانی ہے نہ کوئی مشترک تیرا

 

جمال ِ احمد و یوسف کو رونق تو نے بخشی ہے

ملاحت تجھ سے شیریں ، حسن ِ شیریں میں نمک تیرا

 

تیرے فیض کرم سے نارو نور آپس میں یک دل ہیں

ثنا گر یک زباں ہر ایک ہے جن و ملک تیرا

 

کسی کو کیا خبر کیوں خیر و شر پیدا کیے تو نے

کہ جو کچھ ہے خدائی میں وہ ہے بے ریب و شک تیرا

 

نہ جلتا طور کیونکر ، کس طرح موسیٰؑ نہ غش آتے

کہاں یہ تاب و طاقت جلوہ دیکھے مردمک تیرا

 

دعا یہ ہے کہ وقت مرگ اس کی مشکل آساں ہو

زباں پر داغ کے نام آئے یارب یک بیک تیرا

 

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ