ہم کہ آدابِ قلم لہجۂ لب جانتے ہیں
مدحتِ سرورِ کونین کا ڈھب جانتے ہیں
مجھ کو منت کشِ فریاد نہ ہونے دیں گے
شاہِ طیبہ مرا مقصودِ طلب جانتے ہیں
جو تری یاد کے مصرف نہیں بننے پاتے
ایسے لمحات کو ہم وجہِ غضب جانتے ہیں
اتنی جرأت ہی کہاں ہے کہ چلیں پاؤں سے
ہم ترے شہر کی گلیوں کا ادب جانتے ہیں
چشمِ سرکار نے دانائی کو بخشا ہے شرف
ہم نے پہلے جو نہ جانا تھا وہ اب جانتے ہیں
ہو کے گزرا ہے جو ہوتا ہے جو آگے ہوگا
ان کو اللہ نے بتایا ہے وہ سب جانتے ہیں
منہ کے بل کعبے میں گرتے ہوئے بت,اے فاضل
میرے آقا کی ولادت کا سبب جانتے ہیں