ہو لیلائے جاں کا جو محمل حضوری
ہمیشہ رہے دل کو حاصل حضوری
عطا ہو کبھی حاضری کا وہ لمحہ
کرے میرے دل کو بھی بسمل حضوری
رہا کلبِ دنیا پراگندہ خاطر
ہوئی حاضری میں بھی مشکل حضوری
شریعت کا سرمایہ، طیبہ نصیبی
حقیقت کا جوہر ہے کامل حضوری
مکاں سے مکیں تک رسائی ہے ممکن
بنے زائروں کی جو منزل حضوری
مُیسر ہو دیدارِ آقا مسلسل
بنا دے مجھے اس کے قابل حضوری
مری تشنگی کا مقدر بھی جاگے
دکھا دے کبھی اُن کی محفل حضوری
سوالِ کرم جس کا رد ہو نہ کوئی
بنا دے مجھے ایسا سائل حضوری
ڈھلے زندگی اُسوۂ شاہِ دیں میں
نہ ہونے دے اِک لمحہ غافل حضوری
نظر بھر کے جو اُمِ معبد نے دیکھے
دکھا دے مجھے وہ شمائل حضوری
سفر بحرِ دنیا کا آخر ہو ایسے
بنے کشتیِ جاں کا ساحل حضوری
گنہگار پہنچے شفیعِ اُمم تک
کرا دے سبھی طے مراحل حضوری
جو گھبرائے دل ہجرِ طیبہ میں میرا
سکینت کرے مجھ پہ نازل حضوری
قناعت نہ کر حاضری پر ہی احسنؔ
بنا قلبِ مضطر کی منزل حضوری