یا رب ترے حبیب کی ہر دم ثنا کروں
تیرے کرم کا ساتھ ہو یہ ہی دعا کروں
دل میں ولائے سیدِ لولاک ہو بسی
ہر سانس سے میں وردِ صلِ علیٰ کروں
میرے دیارِ دل کی بھی ہو ختم تیرگی
عشقِ رسولِ پاک سے روشن دیا کروں
لب پر درود پاک کے نغمات ہوں رواں
کچھ اس طرح سے میں بھی تو خود سے وفا کروں
رکھ لیں کنیز مجھ کو بھی گر ملکۂ بہشت
پھر ہر گھڑی میں شکر کا سجدہ ادا کروں
قُربت ملے حضور کی اس در پہ ہی رہوں
دنیا کی بھیڑ بھاڑ سے خود کو جدا کروں
اپنا بنا لیں ناز کو سرکارِ ذی حشم
صد شوق نعلِ پاک پہ یہ جاں فدا کروں