اس در کا جو منگتا ہے وہ شاہوں سے غنی ہے

اعزاز ہے حاصل تجھے اولاد نبی کا

عظمت کی نشانی یہی اعلیٰ نسبی ہے

مل جائے گا سب کچھ ذرا دامن کو پسارو

کس چیز کی ان کے در دولت پہ کمی ہے

امواجِ بہارِ درِ نواب کے صدقے

ہر شاخ تمنا مری پھولوں سے بھری ہے

کہتے ہیں اسے حضرت نواب کی چوکھٹ

سلطاں بھی جہاں مائل دریوزہ گری ہے

فریاد جو تجھ سے نہ کروں، کس سے کروں میں

مشہورِ زمانہ تری فریاد رسی ہے

مجھ میں تو ہنر ہی نہیں کچھ جس پہ کروں ناز

یہ تیرا کرم ہے جو مری بات بنی ہے

دم ٹوٹ رہا ہے مرا ، بے ربط ہیں سانسیں

آجاؤ خدارا بڑی نازک یہ گھڑی ہے

نکہت بھری ہر سمت سے آتی ہیں ہوائیں

کوچہ ہے تمہارا کہ یہ جنت کی گلی ہے

تاریخ شہیدان وفا جس سے ہے روشن

وہ رسم محبت ترے کوچے سے چلی ہے

جب خاک ترے در کی ہوئی ہے مری مٹی

تب جاکے کہیں نازش اکسیر ہوئی ہے

قدموں میں ہی رہنے دے کہ دیوانہ ہوں تیرا

دنیا بھی یہی ہے مری عقبیٰ بھی یہی ہے

اے نورؔ مبارک تجھے اس در کی غلامی

یہ دولت کونین ہے جو تجھ کو ملی ہے