روگ رہتے ہیں کہاں رحمت جہاں ہو چارہ جُو

عالمِ تعمیل میں ذوقِ ثنائے مصطفےٰ

وہ فلک ہے جس پہ ہستی ہے سراپا آبرو

نعت خوانی میں ہے وہ شیرینیِ صوت و صدا

پاؤں چھونے آ رہے ہیں طائرانِ خوش گلو

چاند بھی تو آپ کے طاعت گزاروں میں سے ہے

دیکھئے اس کو ادب سے جب یہ آئے رُو برو

پھر خیالِ مغفرت ہنگامہِ فردا میں ہے

پھر مچل اٹھی ہے اُن کو دیکھنے کی آرزو

پھر ہمیں بھی جسدِ خاکی پر بہت ہی ناز ہو

راہِ خوشنودی میں کام آ جائے گر اپنا لہو

آپ کے در پر نیازِ بے نیازی ہے بہت

آپ کا منگتا کبھی جاتا نہیں ہے کوبکو

گامزن ہوتی ہے ان کی راہ پر جب چشمِ دل

قلب کو دیتی ہے پیغامِ تیقن آرزو

شوق میں جس کی طلب تھی برسرِ عرشِ علیٰ

ارفع و اکمل ہے کتنا ان کا حسنِ گفتگو