کہاں زمین، کہاں آسمانِ سجدۂ شوق

نبردِ عشقِ بلا کش کہاں ہوئی ہے تمام

ابھی تو دور ہے سر سے امانِ سجدۂ شوق

زمانے بھر کو مسلسل فرازِ نیزہ سے

سنا رہا ہے کوئی داستانِ سجدۂ شوق

حقیقت اس کی مری حسرتِ نیاز سے پوچھ

زمانے بھر کو ہے جس پر گمانِ سجدۂ شوق

وہ سنگِ در تو کجا، اُس کی رہگزر دیکھو

قدم قدم پہ سجے ہیں نشانِ سجدۂ شوق

مزا تو تب ہے کہ کھو جائیں آستان و جبیں

بس ایک تو رہے باقی میانِ سجدۂ شوق

وہ روحِ بندگی جس کی تلاش میں ہے جبیں

ہے ماورائے زمین و زمان سجدۂ شوق

خدائے منبر و محراب! یہ دعا ہے مری

کہ لامکاں میں عطا ہو مکانِ سجدۂ شوق

ظہیرؔ کیجے وضو آبِ انفعال سے آپ

ہوئی ہے خلوتِ جاں میں اذانِ سجدۂ شوق