رشکِ مسند ہے بوریا تیرا

نعت سے عشق ہے سو ہونٹوں سے

نام ہوتا نہیں جدا تیرا

وجد میں دو جہان آتے ہیں

ذکر کرتی ہے جب ہوا تیرا

پھول دھڑکن میں گھلتے جاتے ہیں

لب پہ ہے گلشنِ ثنا تیرا

منزلوں تک دئیے جلاتا ہے

راہ میں ایک نقشِ پا تیرا

لفظِ کُن روشنی سراپا بھی

عکس آرا ہے ، جا بجا تیرا

اک ریاضِ نویدِ جنت ہے

گلِ فرماں ، گرہ کشا تیرا

راز بہبود ، سیرتِ اقدس

نازِ فردوس ، راستہ تیرا

معتبر ہے خوئے سخا تیری

پانی بھرتے ہیں اغنیا، تیرا

فرشِ رہ کیوں نہ ہوں مری آنکھیں

عرشِ اولیٰ ہے مرتبہ تیرا

شاخِ بے برگ و بار ڈھونڈتی ہے

جاں فزا لمسِ کیمیا تیرا

عزتیں کاسہِ فقیر میں ہیں

جائے پھر کیوں کہیں گدا تیرا

قرب کے شوق نے مٹا ڈالا

خالقِِ کل سے فاصلہ تیرا

جب ہوئی تزک و احتشام کی بات

ذکر پہلے ہوا ، شہا! تیرا

جاہ کو ہے ہمیشگی ذیبا

اسم ، دائم ، بہاریہ تیرا