جس کا جمال زیبِ رسالت ہے وہ رسول جس کی نظر تجلّیٔ وحدت ہے وہ رسول جس کی جبین صبح کی ساعت ہے وہ رسول ظلماتِ دَہر میں وہ اجالوں کا باب ہے وہ ربِّ روشنی کا حَسین انتخاب ہے

ہے فخر جس پہ آیۂ رحمت کو وہ رسول جس نے دئیے معانی محبت کو وہ رسول محذوف جس نے کر دیا نفرت کو وہ رسول قوسِ قزح ہے امن کی دارین کے لئے وہ رحمتوں کا ابر ہے ثقلین کے لئے

ہے منفرد جو وصفِ شجاعت میں وہ رسول جو مہرباں ہے شانِ جلالت میں وہ رسول لرزاں ہے کفر جسکی عدالت میں وہ رسول نظریں اُٹھیں تو دشمنِ عیّار گر پڑے کافر کے سخت ہاتھ سے تلوار گر پڑے

عادات جس کی سورۂ رحمن وہ رسول ہر بات جس کی آیۂ قرآن وہ رسول جو ہے خدا کا آخری فرمان وہ رسول پیغمبری کی پھر کوئی صورت نہیں رہی بعد اس کے پھر کسی کی ضرورت نہیں رہی

گفتار اُس کا فکر و بصیرت کا باب ہے وہ امن و آتشی کا مکمل نصاب ہے وہ چلتی پھرتی ایک سماوی کتاب ہے جاں حرف و علم و فکر نے اس پر نثار کی تصنیفِ آخریں ہے وہ پرورد گار کی

صورت ، جمالِ نورِ الٰہی لئے ہوئے عادت ، پیمبری کی گواہی لئے ہوئے غربت ، جلال و شوکتِ شاہی لئے ہوئے لب ، بحرِ روشنی کا سفینہ کہیں جسے دل ، علم و آگہی کا مدینہ کہیں جسے

تحریرِ کائنات کا ابجد کہیں جسے انسانیت کی آخری سرحد کہیں جسے وہ پیکرِ جمیل محمد کہیں جسے ہر جنبشِ خیال بصیرت کا باب ہے وہ ربِّ آگہی کی مقدّس کتاب ہے

انسان جس کو سیدِّ نوعِ بشر کہے نوح و مسیح و خضر جسے راہبر کہے خود ربِّ ذی وقار جسے معتبر کہے خوشبوئیں جس عَرق سے سفر ابتدا کریں کرنیں اُسی کے نور سے کسبِ ضیا کریں

جس نام کے طفیل دعائیں ہیں مستجاب ہر سانس جس کی دفترِ انسانیت کا باب ہر لمحہ جس کی زندگی کا صاحبِ کتاب خوشبو ہے جس کی بادِ صبا کے سریر پر کندہ ہے جس کا نام سحر کے ضمیر پر

انصاف میں وہ ذات ہے میزان کی طرح آہنگ میں ہے سورئہ رحمن کی طرح اس کا ہر ایک فیصلہ قرآن کی طرح اِس کی کوئی نظیر ، نہ کوئی مثال ہے وہ شاہکار خالقِ حُسن و جمال ہے