اردوئے معلیٰ

Search

یہی کمال مرے سوختہ سخن کا سہی

چراغ ہو تو گیا ہے وہ انجمن کا سہی

 

تمام عمر کہ یوں بھی سفر میں گزری ہے

سو اب کی بار زمیں تک سفر تھکن کا سہی

 

جواب یہ کہ فناء لُوٹ لے گی بالآخر

سوال گرچہ ترے شوخ بانکپن کا سہی

 

اسیرِ دشتِ حوادث تو پھر بھی مت کیجے

غزالِ دل کو بڑا پاس اس ختن کا سہی

 

جنوں میں عقل پہ پڑنا تو تھا کوئی پردہ

یہ پارچہ ترے رنگین پیرہن کا سہی

 

یہ تذکرہ ہے ترے بے وقار ہونے کا

یہ مرثیہ مرے حرماں نصیب فن کا سہی

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ