الف اکائی، ایک اکلوتا، اصل اکیلا اللہ
اَن داتا، اُمید گھروندا، آس دریچہ اللہ
اجمل، افضل، اکمل، اقدس، احسن، ارحم، اکرم
افسر، اظہر، اکبر، اعظم، ارفع، اعلیٰ اللہ
آن اوقات اشاعت اس کی، آٹھ پہر اشلوک
ارض، آکاش، اذکار اُسی کے، انفس غوغا اللہ
آل اولاد، احزاب احرار، اسقام، اعقاب سے اطہر
اِستقلال، اجلال، اُجلا، العظمتہُ لِلہّ اللہ
اوّل آخر، اُفق، آفاق، آغاز انجام اُسی کے
اسم امرت، اکسیر اُسی کا، آنکھ اجیالا اللہ
انورؔ ارتھ، الفاظ، اسلوب، اظہار، ابلاغ، اکارت
از خود ازبر، ازبس اظہر، از حد اچھا اللہ
٭ اس حمد کے تمام الفاظ الف سے شروع ہوتے ہیں۔
