اردوئے معلیٰ

Search

اللہ کا طاہر پہ کرم خوب ہوا ہے

ہونٹوں پہ سدا حمدِ خدا حمدِ خدا ہے

 

رب سب سے بڑا سب سے بڑا سب سے بڑا ہے

ہم کو یہ سبق سیّدِ عالم نے دیا ہے

 

قادر ہے ہر اک شئے پہ وہی مالک و مولا

اس کے ہی تصرف میں فنا اور بقا ہے

 

یہ شمس و قمر نور جو دیتے ہیں جہاں کو

اِن کی دمک سب ان کی چمک رب کی عطا ہے

 

یہ بات بھی قرآن سے ثابت ہے بلا شک

شہ رگ سے جو نزدیک ہے وہ سچّا خدا ہے

 

مالک وہی اپنا جو ہے رازق و خالق

جو کچھ بھی مِلا ہم کو فقط رب سے مِلا ہے

 

دل سے جو کبھی ذکرِ خدا میں نے کیا ہے

اک نور سا آنگن میں مرے پھیل گیا ہے

 

ممکن ہی نہیں شانِ خداوند بیاں ہو

طاہرؔ یہی قرآنِ مبیں بول رہا ہے

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ