امکان میں تجلّیِٔ واجب ہے کیا، نہ پوچھ
کثرت میں کیا ہے جلوۂ وحدت نما ، نہ پوچھ
وردِ درود کا ہے مِلا فیض کیا ، نہ پوچھ
کیسی بلا میں پھنس گئی میری بلا ، نہ پوچھ
اوجِ مقامِ سرور ہر دو سرا ، نہ پوچھ
اس بات کی نہیں ہے کوئی انتہا ، نہ پوچھ ”
احساس میں مہکتے ہیں توصیف کے گلاب
خوشبوئے حرفِ نعتِ شہِ انبیا ، نہ پوچھ
مہکی زبان قدس پہ کس طرح بات بات
چمکا لسانِ فیض پہ کیا واعظا ! نہ پوچھ
ہر اک کی دھن ہے خامۂ ناعِت نواز دے
سبقت کا شور لفظوں میں کیسے مچا ، نہ پوچھ
ابرِ عطائے زلفِ نبی کی نہیں ہے حد
کتنا دراز لطف کا ہے سلسلہ ، نہ پوچھ
حرفوں کو ناز بس ہے کہ ہیں سلکِ نعت میں
اوجِ دماغِ واصفِ شاہِ ہدٰی ، نہ پوچھ
رہتا تھا انکسار سے جو بوریا نشین
کس شان سے وہ عرش سے اونچا گیا ، نہ پوچھ
فرقت میں ان کی استن حنانہ رو پڑا
ہوتا ہے ہجرِ یار کا کیا ابتلا ، نہ پوچھ
بخشی گئیں حقیر کو ہر جا پہ عظمتیں
کس طرح نعت نے ہے معظم کیا ، نہ پوچھ
