اردوئے معلیٰ

Search

ایک دو آسمان اور سہی

اور تھوڑی اڑان اور سہی

 

شہر آباد ہوں درندوں سے

جنگلوں میں مچان اور سہی

 

دھوپ کو نیند آ بھی سکتی ہے

چھاؤں کی داستان اور سہی

 

بارشوں حوصلے بلند رہیں

میرا کچا مکان اور سہی

 

یہ پسینہ تو اپنی پونجی ہے

ایک مٹھی لگان اور سہی

 

غلطیوں سے نوازتا ہے مجھے

ایک اہل زبان اور سہی

 

شہر میں امن ہے کئی دن سے

کوئی تازہ بیان اور سہی

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ