اے کاش! مِلے مجھ کو رسائی تِرے دَر کی
کرتا ہی رہوں مدح سرائی تِرے دَر کی
سچ ہے کہ محبت میں تِری عظمتِ کونین
شاہی سے بھی بڑھ کر ہے گدائی تِرے دَر کی
ہر اِک پہ کرم، لطف و عطا، جود و سخا بھی
یہ بات مجھے خوب ہی بھائی تِرے دَر کی
اللہ نے دَر خیر کے کھولے ہیں اُسی پر
’’تھی جس کے مقدّر میں گدائی تِرے دَر کی‘‘
یہ بادِ صبا فضل سے تیرے ہی کسی دن
اے کاش! کرے راہنمائی تِرے دَر کی
اِس واسطے برسات ہے انوار کی مجھ پر
تصویر مِرے دِل میں سمائی تِرے دَر کی
آواز بھی اُونچی نہ ہو دربار میں تیرے
تعظیم ہمیں رب نے سکھائی تِرے دَر کی
قُربت کی نظر ڈال اے سلطانِ دو عالم
جاں لے، لے گی ورنہ یہ جدائی تِرے دَر کی
اُس دِن سے رضاؔ نعت ہی کہتا ہے مسلسل
جس دِن سے ہے سوغات یہ پائی تِرے دَر کی
