اردوئے معلیٰ

Search

بے شک وہ صحابی بھی ہیں دامادِ نبی بھی

اوّل ہیں وہی اُمتِ مسلم کے ولی بھی

 

عصمت تو ہوئی ختم نبوت پہ مگر ہاں

محفوظ تھے عصیاں کی نجاست سے علیؓ بھی

 

وہ عہدِ امارت میں بھی تھے فقر سراپا

ٹھکرایا انہوں نے ہر اک اندازِ شہی بھی

 

بوبکرؓ وعمرؓ کے بھی مشیر آپ تھے بے شک

ممنون رہے اُن کی فراست کے غنیؓ بھی

 

اصحابِؓ نبی سب ہی ہدایت پہ ہیں بے شک

اِک نجمِ ہدایت ہیں سرِ چرخ علیؓ بھی

 

اصحابؓ کی اُلفت نے سکھایا ہے یہ نکتہ

روشن ہے وہ دل جس میں رہے حبِّ علیؓ بھی

 

شبیرؓ نے پائی تھی شجاعت بھی علیؓ سے

مظہر تھی اُسی حلم کی طرزِ حسنیؓ بھی

 

دونوں کا عمل مظہرِ تعلیمِ علیؓ تھا

دونوں میں جھلکتا تھا شعارِ پدری بھی

 

کردارِ علیؓ حلمِ حسنؓ میں مترشّح

ایثارِ حسینیؓ میں ہے طِیبِ اسدیؓ بھی

 

حلمِ حسنؓ و طرزِ حسینیؓ میں یقینا

ہے مرتضویؓ حسن، جمالِ نبوی بھی

 

ہے مرتضویؓ خُلق تو اخلاص سراپا

اخلاص فی الاسلام ہے تعلیمِ نبی بھی

 

ہم مرتضویؓ خُلق سے بیگانے ہیں یکسر

اظہارِ محبت میں ہیں باتوں کے دھنی بھی

 

دعوے ہیں بہت حُبِّ علیؓ کے مگر احسنؔ

اخلاص کی خوشبو سے ہے کردار تہی بھی

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ