اردوئے معلیٰ

Search

تیرگی کافور ہو، تابندگی پھولے پھلے

نعت کی محفل سجاؤ روشنی پھولے پھلے

 

رحمتِ سردارِ عالم، عام ہے سب کے لیے

کیوں نہ اُن کے فیض سے ہر آدمی پھولے پھلے

 

نعت کی برکت سے مجھ کو خوش نوائی مل گئی

یا الٰہ العالمیں یہ نغمگی پھولے پھلے

 

آپ کے لب پر رہا ہے ربِّ ھَب لِی اُمّتی

اس دعا کے فیض سے سب اُمتی پھولے پھلے

 

بزمِ طیبہ کی فضاؤں کے سوا ممکن نہیں

زندگی پُرکیف ہو اور ہر خوشی پھولے پھلے

 

ذکرِ سرور کیجیے، اس ذکر کی تاثیر سے

دل تر و تازہ رہے اور روح بھی پھولے پھلے

 

گنبدِ خضرا کے سائے میں گزاروں زندگی

آرزوئے گنبدِ خضرا مری پھولے پھلے

 

نامِ آقا پر لٹا دے جو متاعِ زندگی

خوش وہ دنیا میں رہے عقبیٰ میں بھی پھولے پھلے

 

نعت گوئی کا شرف بھی ہے عطا سرکار کی

اس شرف سے کیوں نہ خاکیؔ قادری پھولے پھلے

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ