اردوئے معلیٰ

Search

جو مدینہ ہم بھی جاتے تو کچھ اور بات ہوتی

وہیں راہ بھُول جاتے تو کچھ اور بات ہوتی

 

میری زیست کے عناصر درِ مصطفی پہ چل کر

میرا ساتھ چھوڑ جاتے تو کچھ اور بات ہوتی

 

یہ ہوا کے مست جھونکے جو ارم سے آرہے ہیں

یہی طیبہ ہو کے آتے تو کچھ اور بات ہوتی

 

یہ ستاروں کا تبسّم ہے نظر نواز لیکن

جو حضور مسکراتے تو کچھ اور بات ہوتی

 

مجھے زہر دینے والے بڑے کم نظر ہیں آقا

تیرے نام پر پلاتے تو کچھ اور بات ہوتی

 

یہ جو نعتِ پاک بیکلؔ سرِ بزم پڑھ رہے ہو

جو مدینہ میں سناتے تو کچھ اور بات ہوتی

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ