حرف میں ، صوت میں آ ، ذوق میں ، وجدان میں آ
اذنِ اظہار عقیدت مرے امکان میں آ
جَل اُٹھیں بامِ تمنا پہ تکلُم کے چراغ
لمعہَ مدحِ نبی ! نطق کے ارمان میں آ
مَیں گدائے درِ توصیف تہی داماں ہُوں
مدحتِ شاہِ دو عالَم ! مرے سامان میں آ
توشہَ اسمِ سکینت بہ نویدِ بخشش
بہرِ اعجازِ شفاعت مری میزان میں آ
لے کے بیٹھا ہُوں سرِ اَوجِ سخن حرفِ طَلب
شوقِ امکانِ ثنا! آ کسی عنوان میں آ
اَبرِ احسانِ مسلسل مری حیرت پہ برس
زرِ توصیفِ معلی مرے دامان میں آ
بامِ اُمید پہ بجھنے کو ہے قندیلِ نظر
طلعتِ خوابِ عنایت مرے حرمان میں آ
مجھ کو اب لکھنی ہے مقصودِؔ سخن کی مدحت
حرف کے جملہ تجمل مرے دیوان میں آ
