ردائے شوق میں مدحت کے تار بن، مرے دل

ردائے شوق میں مدحت کے تار بن ، مرے دل

گدائے شہرِ سخن ہوں ، مری بھی سُن ، مرے دل

 

حروفِ عجز کو کیفِ کرم کے جام پلا

رہے سوار ہمیشہ ثنا کی دُھن ، مرے دل

 

یہ شوق ہیں انہیں ان کی گلی کا موسم دے

یہ شعر ہیں انہیں پلکوں سے جا کے چُن، مرے دل

 

تو ایک عضوِ معطل ہے اور وہ مختار

سو نعت ہوتی ہے کہتے ہیں جب وہ کُن، مرے دل

 

عطا ہوا ہے مجھے مدحِ مصطفی کا ہنر

نہیں ہے اس کے سوا کوئی مجھ میں گُن مرے دل

 

بہت ضروری ہے پھر سے ہو نعت کی تدبیر

شعور کو کہیں لگ ہی نہ جائے گُھن، مرے دل

 

ترا نصیب درخشاں ہے دونوں عالم میں

ملا ہے عشقِ رسالت کا تجھ کو ہُن مرے دل

 

انہیں سے ملتی ہے ہر اک دوائے دردِ نہاں

بہ سوئے شاہ نظر کن و غم مُکن، مرے دل

 

وہی مقام ہے تیرا بدن کے قریہ میں

ہے ’’اُن سے عشق‘​‘​ میں جیسا مقامِ اُن، مرے دل

 

انہی کا رہتا ہوں جن سے ہے زیست کی تعبیر

انہی کا کھاتا ہوں گاتا ہوں جن کے گُن مرے دل

 

مدینہ منزلِ مقصودِؔ شوق ہے واللہ

سو اپنے دیپ جلا، اپنے خواب بُن، مرے دل

یہ نگارش اپنے دوست احباب سے شریک کیجیے
Share on facebook
Share on twitter
Share on whatsapp
Share on telegram
Share on email

اشتہارات

لُطفِ سُخن کچھ اس سے زیادہ

اردوئے معلیٰ

پر

خوش آمدید!

گوشے

متعلقہ اشاعتیں

مصطفی جان رحمت پہ لاکھوں سلام
کلفتِ جاں میں ترے در کی طرف دیکھتا ہوں
فاصلوں کو تکلف ہے ہم سے اگر ، ہم بھی بے بس نہیں ، بے سہارا نہیں
بے چین ہوں مدت سے مجھے چین عطا ہو
اگر میں عہد رسالت ماب میں ہوتا
مرا ذوقِ سفر محوِ سفر ہے
ہر موج ہوا زلف پریشانِ محمدؐ
جانِ کرم حضور ہیں شانِ عطا حضور
قصہء شقِّ قمر یاد آیا​
صاحبِ جود و سخاوت کون ہے تیرے سوا

اشتہارات