اردوئے معلیٰ

Search

سرمایۂ فن اپنا ڈوبا جو خساروں میں

صد شکر چلا آیا میں نعت نگاروں میں

 

جس روز سے دیکھا ہے آنکھوں نے دیار اُن کا

اب صبح و مسا گُم ہیں طیبہ کے نظاروں میں

 

سرکار کرم کیجے بے حال ہوئی اُمت

یاں دین کی سچائی گُم ہو گئی غاروں میں

 

بوبکرؓ ہوں، عثماںؓ ہوں، فاروقؓ کہ حیدرؓ ہوں

ہم فرق نہیں کرتے سرکار کے یاروں میں

 

گھنگھور اندھیروں میں، لازم ہے سفینے بھی

رہ یاب ہوں اور دیکھیں کچھ نور ستاروں میں

 

عشاق کی نگری میں ڈھونڈے سے نہیں ملتا

اک اُسوۂ آقا کا آئینہ، ہزاروں میں

 

ایماں ہے کتابوں میں، سچائی کہاں ڈھونڈیں؟

سچائی کے پیکر تو، سوتے ہیں مزاروں میں

 

سرکار کی سیرت کا پرتو بھی نظر آئے

ہیں دل سے اگر شامل ہم مدح گزاروں میں

 

غزوات کی سنت جب زندہ ہو عزیزؔ احسن

نام آئے تمہارا بھی جانباز سواروں میں

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ