اردوئے معلیٰ

Search

طورِ سینا کی کہانی اور ہے

دل پہ کچھ جلوہ فشانی اور ہے

 

شیخ جی کی لن ترانی اور ہے

خوبیِ رطب اللسانی اور ہے

 

قصّۂ ماضی سے ملتی ہی نہیں

میری موجودہ کہانی اور ہے

 

شوق سے ہوتا ہے دل ایذا طلب

عشق کی ایذا رسانی اور ہے

 

مسکرا دینا بھی پہلوئے خوشی

دل کی لیکن شادمانی اور ہے

 

رقص و نغمہ کب ہے، کب ہے ناؤ نوش

مقتضائے زندگانی اور ہے

 

زندہ ہونے کی مرے پہچاں الگ

میرے مرنے کی نشانی اور ہے

 

اے نظرؔ کیا دل پہ کوہِ غم گرا

اب کے اشکوں کی روانی اور ہے

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ