اردوئے معلیٰ

Search

عاصیوں کو در تمھارا مل گیا

بے ٹھکانوں کو ٹھکانہ مل گیا

 

فضلِ رب سے پھر کمی کس بات کی

مل گیا سب کچھ جو طیبہ مل گیا

 

کشف راز من رانی یوں ہوا

تم ملے تو حق تعالیٰ مل گیا

 

نا خدائی کے لیے آئے حضور

ڈوبتوں نکلو سہارا مل گیا

 

آنکھیں پُرنم ہوگئیں سر جھک گیا

جب ترا نقشِ کفِ پا مل گیا

 

خلد کیسا کیا چمن کس کا وطن

مجھ کو صحرائے مدینہ مل گیا

 

ان کے طالب نے جو چاہا پا لیا

ان کے سائل نے جو مانگا مل گیا

 

اے حسنؔ فردوس میں جائیں جناب

ہم کو صحرائے مدینہ مل گیا

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ