اردوئے معلیٰ

فکر و فن حرفِ سخن نکتہ رسی مبہوت ہے

رو بروئے نعتِ سرور شاعری مبہوت ہے

 

لفظ ان کی شان کے لائق میسر ہی نہیں

ہندی اردو محوِ حیرت فارسی مبہوت ہے

 

تذکرہ شاید چھڑا ہوگا دیارِ نور کا

جنت الفردوس کی بارہ دری مبہوت ہے

 

کون گزرا ہے فضائیں مشکبو کرتا ہوا

شہرِ خوش تمثیل کی ہر اک گلی مبہوت ہے

 

واہ رزقِ خاکِ شہرِ نور ہونا ہے مجھے

زائرِ بطحا کی پلکوں پر نمی مبہوت ہے

 

نقشِ نعلینِ نبی کمرے میں آویزاں کیا

بام و در میں راج کرتی روشنی مبہوت ہے

 

ذکر ہے شاہِ مدینہ کے لب و رخسار کا

سر بہ خم ہیں نکہتیں اور تازگی مبہوت ہے

 

شان و شوکت دیکھ کر ادنیٰ گدائے شاہ کی

بادشاہانِ جہاں کی سروری مبہوت ہے

 

دیکھ کر تکریمِ شاہِ دوسرا معراج پر

کہکشائیں دنگ ہیں جبریل بھی مبہوت ہے

 

دو جہاں کی بادشاہت اور غذا نانِ جویں

چھال کے بستر پہ ساری سادگی مبہوت ہے

 

گفتگو اشفاق سن کر سرورِ کونین کی

نکتہ داں سکتے میں ہیں دیدہ وری مبہوت ہے

یہ نگارش اپنے دوست احباب سے شریک کیجیے

اشتہارات

لُطفِ سُخن کچھ اس سے زیادہ

اردوئے معلیٰ

پر

خوش آمدید!

گوشے۔۔۔

حالیہ اشاعتیں

اشتہارات

اشتہارات