مطلعِ نعت ہے ورائے گماں
نطق مفلوج سر جھکائے زباں
جانے کس دم ، کرم وہ فرما دیں
روز اُمید پر سجائے مکاں
مرکزِ شوق ہے وہ گنبدِ سبز
عاصیوں کے لیے ہے جائے اماں
بعدِ سدرہ سفر کدھر تھا، کوئی
گر بتائے تو کیا بتائے کہاں
جاے وصلِ حبیب و رب تھی عجب
تھا سبھی کچھ وہاں سوائے مکاں
نعتِ آقا کی برکتیں ہیں فقط
میرے نامے کے جو گھٹائے زیاں
سر اُٹھاؤں جو سنگِ در سے ترے
شوق بارِ دگر گرائے وہاں
پیش کرتا ہوں رو بہ روے حرم
دل کی دف پر ہی نغمہ ہائے فغاں
آج منظر پناہ لے اُن کی
ہو نہ جائے کہیں فنائے زماں
