میرے صادق میرے امین سلام
دل پذیر اور دل نشین سلام
بھیجتا ہے درود ان پہ خدا
پیش کرتے ہیں مومنین سلام
تجھ کو کرتا ہے عرش سے خالق
اے کھجوروں کی سر زمین سلام
رمز اوقافِ الکتاب درود
اس کی ہر آیت مبین سلام
لکھ رہا ہے ابد کی تختی پر
میرا ایمان اور یقین سلام
پیروکار ان پہ جاں لٹاتے ہیں
اور کرتا ہے ان کو دین سلام
سبز گنبد کو دیکھ کر ہر روز
آسماں کہتا ہے زمین سلام
نعت پڑھنے کی دیر تھی مظہرؔ
بولے محفل میں حاضرین سلام
