نطق و بیان و ہمّتِ گفتار دم بخود
وہ جلوہ ہائے نور کہ اظہار دم بخود
نقطہ بھی حسنِ اسمِ محمّد پہ بار ہے
تشبیہ ،استعارہ و اشعار دم بخود
تحریر ہو تو کیسے جلالت مآب حسن
خامہ دو نیم سرنگوں ، افکار دم بخود
وہ تابشِ ضحٰی ہو کہ والّیل کا جمال
ان کے حضور دن کہ شب تار، دم بخود
قرآں سرا ہوئے جو وہ قدسی مقال لب
دانشوارنِ عصر تھے لاچار دم بخود
عالم ہے ایک دیدۂ حیرت بصد نیاز
جلوہ کریں حضور تو ابصار دم بخود
اِس دشت جاں میں چمکیں اگر ان کے پائے ناز
ہوں چشم و گوش و لب پئے دیدار دم بخود
چوموں کبھی جو خواب میں بھی ان کا نقشِ پا
مخمور جاں ہو دل بھی ہو سرشار دم بخود
امڈی جو ان کی یاد تو جل تھل تھا روح تک
آنسو سرشکِ خوں ہوئے رُخسار دم بخود
نوری فضائے شہرِ مدینہ نظر میں ہے
اس حاضری پہ طالعِ بیدار دم بخود
