اردو معلی copy
(ہمارا نصب العین ، ادب اثاثہ کا تحفظ)

نظر خواب میں جب پڑی ہے حرم پر، پکارا مرے دل نے اللہ اکبر

نظر خواب میں جب پڑی ہے حرم پر، پکارا مرے دل نے اللہ اکبر

مجھے لے کے آیا جو میرا مقدر، پکارا مرے دل نے اللہ اکبر

 

جو کعبے کو دیکھا تو دیکھا یہ منظر، نظر سب کی ہے آج باب کرم پر

بڑا جاں فزا ہے یہ کعبے کا منظر، پکارا مرے دل نے اللہ اکبر

 

یقیں ہے یہ مجھ کو دعا جتنی مانگوں، وہ منظور ہوں گی جو دل سے پکاروں

ہے میزاب رحمت مرے آج سر پر، پکارا مرے دل نے اللہ اکبر

 

مَیں حاضر ہوں، حاضر ہوں، حاضر خدایا، یہ تیرا کرم ہے جو مجھ کو بلایا

یہی ایک نعرہ ہے سب کی زباں پر، پکارا مرے دل نے اللہ اکبر

 

مری چشم پر نم نے دی جب گواہی، تو کعبے کے اندر سے آواز آئی

چلے آؤ یہ گھر ہے رحمان کا گھر، پکارا مرے دل نے اللہ اکبر

 

یہ فیضان تیرا ہے جن و بشر پر، طواف حرم کا ہے دلچسپ منظر

مودب کھڑے ہیں تونگر گدا گر، پکارا مرے دل نے اللہ اکبر

 

مقام ابراہیم پر مَیں جھکا ہوں، ترے آگے میں دست بستہ کھڑا ہوں

ترا در لگے مجھ کو آغوش مادر، پکارا مرے دل نے اللہ اکبر

 

خطا مجھ کو سب یاد آنے لگی ہے، مری چشم پرنم سے بہتی ندی ہے

گنہگار بندہ ہوں اے بندہ پرور، پکارا مرے دل نے اللہ اکبر

 

ان آنکھوں نے دیکھا صفا اور مروہ، ہے حسرت مری دیکھوں میں خاک طیبہ

ہے طیبہ کا نقشہ مرے دل کے اندر، پکارا مرے دل نے اللہ اکبر

 

بقول عمر بوسۂ سنگ اسود، بھی ہے دستور اتباع محمد

اسے چوم لینا بھی ہے وصل دلبر، پکارا مرے دل نے اللہ اکبر

 

نظر ملتزم پر ہے میری برابر، ہے باب کرم پر نظر بندہ پرور

سمیٹے ہے مجھ کو مطاف اپنے اندر، پکارا مرے دل نے اللہ اکبر

 

تری حمد جاری ہے سب کی زباں پر، تو کر مغفرت آج خوشدل ہے در پر

ہو مقبول حج تو وہ ہے حج اکبر، پکارا مرے دل نے اللہ اکبر

یہ نگارش اپنے دوست احباب سے شریک کیجیے
Share on facebook
Share on twitter
Share on whatsapp
Share on telegram
Share on email
لُطفِ سُخن کچھ اس سے زیادہ

اردوئے معلیٰ

پر

خوش آمدید!

گوشے

متعلقہ اشاعتیں

زمین و آسماں گُونجے بیک آواز، بسم اللہ
اَلحَمَّد توں لے کے وَالنَّاس تائیں​
خدا کا ذکر، ذکرِ دلکشا ہے
اُن پہ اللہ کرم کرتے ہیں
ترا لطف و کرم بے انتہا ہے
خدا کی حمد ہر لحظہ طریقِ عاشقاں ہو گا
خداوندِ زمین و آسماں تُو
رکُوع و سجود و قیام اللہ اللہ
دایا سب جہانوں پر ترا فضل و کرم ہے
خدا مُونس شفیق و مہرباں ہے