نعتِ ابجد بہ ردیف بسم اللہ

(ا)

اذن و فضل و عطا بسم اللّٰہ

مدح و نعت و ثنا بسم اللّٰہ

 

(ب )

بخشی رب نے سعادتِ مدحت

شکرِ مولا بجا بسم اللّٰہ

 

(پ )

پیش منظر ، پسِ خیال بھی وہ

دل کا غنچہ کھِلا بسم اللّٰہ

 

(ت )

تیرے اک جلوۂِ تبسّم سے

گلستاں کھِل اٹھا بسم اللّٰہ

 

(ٹ )

ٹل نہ جائے کہیں قضا آقا

تیرے در ہوں پڑا بسم اللّٰہ

 

(ث )

ثمرہ بخشش ہی حشر میں ہو گا

نعت کہیے سدا بسم اللّٰہ

 

(ج )

جگ میں جتنے ہیں خوش نما منظر

خاکِ پا کی عطا بسم اللّٰہ

 

(چ )

 

چاند سورج، ستارے، قوسِ قزح

تیرے رُخ کی ادا بسم اللّٰہ

 

(ح )

حکمِ مالک ہے مومنوں کے لیے

کہیے صلِّ علیٰ بسم اللّٰہ

 

(خ )

خدمتِ خلق روحِ خیرِ عمل

طاعتِ مصطفٰی بسم اللّٰہ

 

(د)

دھڑکنوں میں بسے وہ نامِ حسیں

مصطفٰے مجتبٰے بسم اللّٰہ

 

(ڈ )

ڈالی ڈالی شجر شجر مہکے

ذکرِ صلِّ علٰی بسم اللّٰہ

 

(ذ )

ذکر و فکر و شعور دانائی

اک سُخن پر فدا بسم اللّٰہ

 

( ر)

رحمتِ عالمیں بس اک چھینٹا

دل ہے میرا بچھا بسم اللّٰہ

 

(ز )

زندگی بندگی سے ہو معمور

دل کی دنیا بسا بسم اللّٰہ

 

(ژ)

ژند و پاژند اور کہن مصحف

تیرے دیں سے فنا بسم اللّٰہ

 

(س)

سایہ گستر ہو حشر میں ہم پر

زُلفِ رحمت ردا بسم اللّٰہ

 

(ش )

شب پرستوں کو خوف ہے اب بھی

مہرِ خیر و وفا بسم اللّٰہ

 

( ص)

صبرو صدق و وفا کی ہر مشعل

پائے کسبِ ضیا بسم اللّٰہ

 

(ض )

ضو فشاں ہے جہاں کا ہر گوشہ

آمدِ مصطفٰے بسم اللّٰہ

 

( ط)

طیّب و طاہر و مطہّر ہے

آپ کی خاکِ پا بسم اللّٰہ

 

( ظ)

ظلِّ رحمت کرم گھٹا برسے

گیسوئے مشک سا بسم اللّٰہ

 

( ع)

عینِ رحمت وہ سرمگیں آنکھیں

میری جانب ہوں وا بسم اللّٰہ

 

( غ)

غم کے مارو چلو سُوئے طیبہ

بابِ رحمت کھُلا بسم اللّٰہ

 

( ف)

فکرِ دنیا و آخرت کیوں ہو

ان کا در مل گیا بسم اللّٰہ

 

( ق)

قافلے جب چلیں مدینے کو

دل ہو آگے مرا بسم اللّٰہ

 

قافلے اب چلے مدینے کو

دل تو پہلے گیا بسم اللّٰہ

 

( ک)

کیسے منظر ہیں راہِ طیبہ میں

مجھ کو زائر بتا بسم اللّٰہ

 

( گ)

گلستاں گلستاں ہے ان کی مہک

مست بُو ہے صبا بسم اللّٰہ

 

( ل)

لبِ پُر نور چشمۂِ راحت

دل نشیں ہے صدا بسم اللّٰہ

 

( م )

میرے آقا کی بخششیں واللہ

ہر کسی پر عطا بسم اللّٰہ

 

( ن)

نور و نکہت تجلّیاں ان کی

ہر جہاں کی جِلا بسم اللّٰہ

 

( و)

وہ جو آئے تو روشنی پھیلی

اب بھی ہے جگمگا بسم اللّٰہ

 

( ہ)

ہم بھی بیٹھے ہیں راہ میں آقا

ہم پہ بھی ہو لقا بسم اللّٰہ

 

( ی)

یہ جو انساں کی قدر ہے کچھ بھی

ہے بس ان کی سخا بسم اللّٰہ

 

( ے)

یہ جو توفیقِ نعت ہے نوری

شکر واجب ہوا بسم اللّٰہ