اردوئے معلیٰ

Search

کرم کے بادل برس رہے ہیں

دلوں کی کھیتی ہری بھری ہے

 

یہ کون آیا کہ ذکر جسکا

نگر نگر ہے گلی گلی ہے

 

یہ کون بن کر قرار آیا

یہ کون جانِ بہار آیا

 

گلوں کے چہرے ہیں نکھرے نکھرے

کلی کلی میں شگفتگی ہے

 

دیئے گلوں کے جلائے رکھنا

نبی کی محفل سجائے رکھنا

 

جو راحتِ دل سکونِ جاں ہے

وہ ذکر ذکرِ محمدی ہے

 

نبی کو اپنا خدا نہ مانو

مگر خدا سے جدا نہ جانو

 

ہے اہلِ ایماں کا یہ عقیدہ

خدا خدا ہے نبی نبی ہے

 

نہ مانگو تم دنیا کے خزینے

چلو نیازی چلیں مدینے

 

کہ بادشاہی سے بڑھ کے پیارے

نبی کے در کی گداگری ہے

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ