اردوئے معلیٰ

Search

ترا لطف تیری عطا فاطمہ

ہمیں بھی ہے در کار یا فاطمہ

 

سخاوت ہے دامن پسارے ہوئے

ترا گھر ہے رشکِ غنا فاطمہ

 

ہوئی بزمِ کونین کی آبرو

پدر کی ترے خاکِ پا فاطمہ

 

کیا ہے ہمیشہ تری یاد نے

مداوا مرے رنج کا فاطمہ

 

ملائک ہیں خدامِ در آپ کے

یہ اوجِ کمال آپ کا فاطمہ

 

نجابت ، شرافت ، نزاکت ، حیا

ہر اک وصف کی انتہا فاطمہ

 

اجالے کرے مہر و مہ کو عطا

تری جھونپڑی کا دیا فاطمہ

 

ہوئی جس پہ تیری نگاہ کرم

ہوا پھر نہ وہ غمزدہ فاطمہ

 

ہیں زیبائشِ آسمان وفا

حسین و حسن ، مرتضی ، فاطمہ

 

ہے جانِ طہارت، خدا کی قسم

تری نور پیکر ردا فاطمہ

 

ملا تجھ کو گھٹی میں صبرِ جمیل

قناعت ہے تیری غذا فاطمہ

 

عیاں مہر تاباں کی مانند ہے

فضیلت تری سیدہ فاطمہ

 

یہ تیری صدف تیری ادنیٰ کنیز

ہے سو جاں سے تجھ پر فدا فاطمہ

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ