اردوئے معلیٰ

Search

زمین و آسماں گُونجے بیک آواز، بسم اللہ

طلوعِ صبحِ مدحت کا ہُوا آغاز، بسم اللہ

 

حرا سے کعبہ و عرشِ عُلا تک جلوہ فرمائی

زمینِ دل پہ بھی فرمائیے گا ناز، بسم اللہ

 

میانِ حشر ہوں گی جب ’’الیٰ غیری‘​‘​ کی تدبیریں

کہیں گے ہم گنہگاروں کو چارہ ساز بسم اللہ

 

اٹھے تعلیق کے نقشے جدارِ کعبۃ اللہ سے

ترے نطقِ بلاغت کا تھا یہ اعجاز بسم اللہ

 

ابھی سوچا ہی تھا مَیں نے تری مدحت سرائی کا

مضامیں غیب سے آئے بصد انداز، بسم اللہ

 

ترے در کا کوئی لکنت زدہ بھی گر دہن کھولے

زمانہ کہہ اٹھے گا، طوطئ شیراز بسم اللہ

 

’’ بلیٰ‘​‘​ کے ساتھ ہی تارِ درودی چھیڑ ڈالے تھے

درونِ روح بجتا ہے یہی اک ساز بسم اللہ

 

تحیّر میں ہے تیری رفعتوں کے سامنے رفعت

ورائے فہم ہے تیرا خطِ افراز بسم اللہ

 

سُنا اے آشنائے نعت پھر سے نُور کا نغمہ

مرا شوقِ فراواں ہے ترا ہمراز، بسم اللہ

 

بحارِ شورشِ امواجِ حیرت کی روانی ہے

ترا پیشِ خرد ہے چشمۂ اعجاز بسم اللہ

 

چلو مقصودؔ ! آیا ہے بُلاوا پھر مدینے سے

کہ خود ہی تو ردیفِ نعت ہے غمّاز، بسم اللہ

 

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ