سب کو معلوم ہے مولا جو ہے عظمت تیری

تیرا ہر حکم اٹل ، قادرِ مطلق تو ہے

منصف اعلا ہے توہی ، اعلا عدالت تیری

قطرے شبنم کے ، سمندر کی روانی دیکھی

غنچہ و گل میں نظر آئی لطافت تیری

دن بھی تیرے ہیں ، مہینے بھی برس بھی تیرے

ایک اک لمحہ ترا اور ہے ساعت تیری

میرے مولا تیرے الطاف و کرم کے صدقے

رسوا ہونے سے بچا لیتی ہے رحمت تیری

تجھ کو معلوم ہے سب ، سوچ رہا ہوں جو بھی

صدقے جاؤں ترے ، ہے خوب سماعت تیری

ناتواں ہم ہیں خطا وار بھی ہیں عاصی بھی

توہے غفار کرم کرنا ہے عادت تیری

ذکر نمرود کا فرعون کا جب ہوتا ہے

آئی ہے یاد مرے مولا جلالت تیری

میری حاجات کو پورا کیا مولا تو نے

لمحہ لمحہ رہی طاہرؔ پہ عنایت تیری