سایہ افگن تِرا دامان ہے سبحان اللہ
دھوپ محشر کی بھی حیران ہے سبحان اللہ
نُقَبائے مَہِ طیبہ تھے جو سابِق ان میں
اِک مَہِ مَطلَعِ کنعان ہے سبحان اللہ
جس سے عالَم کے حسینوں نے ملاحت پائی
حسنِ شہ کا وہ نمکدان ہے سبحان اللہ
مالکُ المُلک کے محبوب ! تِرے صحرا کا
ذرّہ اِک مُلکِ سُلیمان ہے سبحان اللہ
عقلِ سقراط و ارسطو ہے ترے در کی کنیز
اور بندہ تِرا لقمان ہے سبحان اللہ
ناخنِ شاہ کو کر یاد گرفتارِ بلا !
ساری مشکل ابھی آسان ہے سبحان اللہ
دَم ہے اَموات کا مُحیِی تو لُعابِِ اَقدس
دفعِ بیمارئ اَبدان ہے سبحان اللہ
کیوں نہ حیواں کی زباں سمجھے وہ تلمیذِ خدا
وہ تو بے جاں کا زباں دان ہے سبحان اللہ
قبر کیونکر نہ ہو روشن کہ معظمؔ دل میں
عشقِ سرکار کا لمعان ہے سبحان اللہ
