اردوئے معلیٰ

Search

لے چلا مجھ کو طالعِ بیدار

میری منزل وہ گنبد و مینار

 

فرقتوں میں حضوریوں کے مزے

عرصۂ ہجر، لمحۂ دیدار

 

اپنی خوش قسمتی پہ نازاں ہیں

ہم غلامانِ احمد مختار

 

حاصلِ عمر ہے، وہ اک لمحہ

جب لکھا تھا وہ نام پہلی بار

 

افصح الناس! دے سخن کی بھیک

دل میں رکھتا ہوں خواہشِ اظہار

ق

رحمتِ دو جہاں ، شہِ ابرار

آج گویا ہے پھر لبِ اظہار

 

عرصہِ غم، دراز ہے مولا

مضطرب ہے بہت دلِ بیمار

 

پیش از مرگ، اے مرے آقا

روئے پُر نور دیکھ لوں اک بار

 

تو ہے محبوبِ قادر مطلق

تو ہے مطلوبِ مالک و مختار

 

تو ہے خالق کی اولیں تخلیق

تو مصور کا آخری شہکار

 

تیرے ناکردہ کار اخترؔ کا

آخری آسرا، ترا دربار

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ