اردوئے معلیٰ

Search

عالمِ انسانیت کو کاش مل جائے شعور

آپ کی رحمت اماں گاہِ زمانہ ہے حضور

بے عمل ہے گو مسلماں، جانتا ہے یہ ضرور

تیرگی ہو گی فقط اخلاقِ سرور ہی سے دور

پھر بھی یہ ایام کی نیرنگیوں میں مست ہے

دین کی دولت کو کھو کر آج خالی دست ہے

عہدِ اصحابِ کرامؓ اس کو ابھی تک یاد ہے

آپ کے تذکار میں نطق اس کی برق و باد ہے

پھر بھی شہرِ سیرت و کردار یاں برباد ہے

خود مسلماں پیرویِ بولہب میں شاد ہے

اپنا منصب بھول کر غیروں کا کاسہ لیس ہے

عیش ہے لیلیٰ تو یہ اس کے لیے اک قیس ہے

 

حکمرانوں میں سبھی مذہب سے کوسوں دور ہیں

دیکھ کر ان کے چلن سب اہلِ دل رنجور ہیں

حرفِ حق آتا نہیں لب پر بڑے مجبور ہیں

تیرہ تر ماحول میں افکار بھی معذور ہیں

رب کے پیارے ! کر بھی دیجے رب سے اب تو یہ دعا

دین کے دارالشفا سے پائے پھر مسلم دوا

دھوکا بازوں کے لیے فرما دیا تھا آپ نے

وہ بایں اطوار، ہرگز ہیں نہ اپنی قوم کے[۱]

پھر بھی دھوکے باز میری قوم کے رہبر بنے

چودھراہٹ کی انہیں کنجی ملی اس قوم سے

ایسی صورت میں پنپنا تو بہت دشوار ہے

لیکن آقا ! آپ چاہیں تو یہ بیڑا پار ہے

آپ کردیں عرض گر رب سے کہ دے توفیق اب

ملَّتِ مسلم کے فرقے ایک ہی ہو جائیں سب

بھول جائیں اب مسلماں نام و ناموسِ نسب

سامنے رکھیں یہ اپنے اب فقط منشائے رب

دین کا جھنڈا کریں کردار سے اپنے بلند

ہوں ہر اک میدان میں پھر سے مسلماں ارجمند

 

ہو تعاون قوم کا بس نیکیوں کے کام میں[۲]

حسن ہی دیکھیں برابر کام کے انجام میں

رنگ تو حیدی نظر آ جائے صبح و شام میں

آئے ہرگز اب نہ کوئی رہزنوں کے دام میں

اِثم و عدواں میں تعاون کا چلن معدوم ہو[۳]

خیر کی بارش ہمارے باغ کا مقسوم ہو!

 

جمعرات: ۱۳؍رمضان المبارک، ۱۳۳ھ…۲؍اگست ۲۰۱۲ء
۱۔لَیْسَ مِنَّا مَنْ غَشَّنَا۔دھوکادینے والا ہم میں سے نہیں ہے۔
One who deceives us is not from among us.
۲۔۳۔تَعَاوَنُوْا عَلَی الْبِرِّ وَالتَّقْوٰی ص وَلَا تَعَا وَنُوْا عَلَی الْاِثْمِ وَالْعُدْوَانِ ص
تعاون کرو نیکی میں اور پرہیزگاری میں اور مت تعاون کرو
گناہ میں اور ظلم میں۔ (آیت ۲، سورہ المآ ئدہ ۵)
یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ