قرآن سے پاتے ہیں کیا خوب یہ دانائی
’’جآوٗکَ‘‘ پڑھا جب سے، عُشاق کی بن آئی
اقرار گناہوں کا کرتے ہوئے روتے ہیں
کہتے ہیں ’سیہ کاری‘ روضے پہ تو لے آئی!
دربارِ رسالت سے پاتے ہیں تسلی وہ
آتے ہیں یہاں جو بھی بخشش کے تمنائی!
ہوں عفو طلب عاصی، آقا بھی یہی چاہیں!
تن رَبّ کی طرف سے یوں ہوتی ہے پذیرائی
کِھل جاتے ہیں سب غنچے پھر مغفرتِ رَبّ کے
اللہ بھی کرتا ہے ایسی چمن آرائی!
کیا خوب عزیزؔ احسن، نسخہ یہ ملا تجھ کو
یوں تیری معافی کی صورت بھی نکل آئی!
نوٹ:بعد صلوٰۃ العشاء ’’نسخہ ہائے وفا‘‘ پڑھنے لگا۔ تو فیض احمد فیضؔ
کا شعری فیض پہنچا۔ وہ کہتے ہیں:
ہم سادہ ہی ایسے تھے کی یونہی پذیرائی
ہفتہ : ۱۶؍ ذیقعدہ ۱۴۲۹ھ…۱۵؍ نومبر ۲۰۰۸ء