اردوئے معلیٰ

Search

لرزتے جسم کا بھونچال دیکھنے کے لیے

کب آؤ گے مری دھمّال دیکھنے کے لیے ؟

 

چلی ھے دھیان کے جادُو نگر میں تیز ھوا

کسی پری کے کھُلے بال دیکھنے کے لیے

 

چراغ لے کے مَیں پھِرتا ھوں سرد گلیوں میں

ھوائے شب کے خدوخال دیکھنے کے لیے

 

چھڑک رھا ھوں تری پتّیوں پہ اپنا لہو

سفید پھول ! تجھے لال دیکھنے کے لیے

 

سُنا ھے جان سے جانا ھے دیکھنا تُجھ کو

نکل پڑا ھوں بہرحال دیکھنے کے لیے

 

یقین کر کہ تری اِک نگاہ کافی نہیں

ھماری حالتِ بے حال دیکھنے کے لیے

 

ھنسی ھنسی میں نکل آئے آنکھ سے آنسو

کسی کے ھاتھ میں رُومال دیکھنے کے لیے

 

نگاہ چاھیئے شفّاف پانیوں جیسی

وہ رُوئے آئنہ تمثال دیکھنے کے لیے

 

بڑھا رھا ھے ابھی لَو چراغِ بوسہ نُما

ترے دمکتے ھوئے گال دیکھنے کے لیے

 

کہیں سے لائیے یادوں کا آئنہ ، فارِس

ھمارے بیتے مہ و سال دیکھنے کے لیے

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ