اردوئے معلیٰ

Search

میرا دل دل نہیں ہوتا یہ بیاں ہوتا

نامِ احمد جو نہ لکھتا تو یہ ویراں ہوتا

 

ہجرِ طیبہ کا اگر داغ نمایاں ہوتا

پھر میرا سینہ بھی صد رنگ گلستاں ہوتا

 

رابطہ سرورِ کونین سے گر رکھتا بحال

آج کے دور کا انساں نہ پریشاں ہوتا

 

اپنی پلکوں سے کیا کرتا صفائی ہر روز

میں درِ احمدِ مختار کا درباں ہوتا

 

کاش میرا بھی جنم عہدِ نبی میں ہوتا

میں بھی دربارِ رسالت کا ثنا خواں ہوتا

 

دیپ سرکار کی الفت کے جلائے جاتے

دل میں حسرت ہی کوئی ہوتی نہ ارماں ہوتا

 

ان کی الفت کا بدل بنتا مرے شعر کا فن

شمع کی طرح ہر اک لفظ فروزاں ہوتا

 

کربلا آشنا ہوتی جو نبی کی امت

پارہ پارہ نہ یوں ہر صفحہء قرآں ہوتا

 

اک تجلی جو میرے آقا کی پڑتی مطہرؔ

مثلِ مہتاب میرا سینہ درخشاں ہوتا

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ