اردوئے معلیٰ

Search

کارِ وفا محال تھا، ناکام رہ گیا

قصّہ مرا بھی تشنۂ انجام رہ گیا

 

شب کو بھی میں چھڑا نہ سکا رہن درد سے

دن بھی اسیر گردشِ ایّام رہ گیا

 

ظلمات پُر فریب میں اُلجھی رہی نظر

محروم دید ماہ سر بام رہ گیا

 

تصویرِ جاں کو حسرتِ تکمیل ہی رہی

اک نقشِ آرزو تھا کہ بس خام رہ گیا

 

تکتا ہوں چھوٹ کر بھی کمیں گاہِ دہر کو

دل جیسا اک اسیر تہِ دام رہ گیا

 

غارت گر سخن تھی ہوائے خیالِ ہجر

بجھ کر چراغِ حرف سر شام رہ گیا

 

اک خواہش دوام کہ تھی ضامن کمال

رخصت ہوئی تو نقش ہنر خام رہ گیا

 

ہر تہمتِ جنوں سے تو ہم ہو گئے بَری

سر پر دفاعِ ہوش کا الزام رہ گیا

 

احوال کیا سنائیں جنابِ ظہیرؔ کا

عرصہ ہوا کہ مر گئے بس نام رہ گیا

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ