کرم یہ بالیقیں ہے اور میں ہوں
مدینے کی زمیں ہے اور میں ہوں
مِری معراج دیکھو آؤ دیکھو
خُدا مجھ سے قریں ہے اور میں ہوں
نبی کے سنگِ دَر پر مرحبا! صد
مِری یارو جبیں ہے اور میں ہوں
ملائک بھی برابر صف بہ صف ہیں
یہیں خُلدِ بریں ہے اور میں ہوں
نبی کے پیار کی برکت مِلی ہے
ہر اِک پل عَنبریں ہے اور میں ہوں
مدینہ چھوڑ کر جانا نہیں ہے
کہ رحمت سب یہیں ہے اور میں ہوں
رضاؔ خوش بختیاں تو دیکھ میری
مقدّر دِلنشیں ہے اور میں ہوں