اردوئے معلیٰ

Search

ہے تشنئہ تکمیل مدینے کی تمنا

اے موت ابھی اور ہے جینے کی تمنا

 

بس اکِ تمنا ہے قرینے کی تمنا

وہ صرف تمنا ہے مدینے کی تمنا

 

اللہ غنی رفعتِ ایوانِ محمد

ہے عرشِ الہیٰ کو بھی زینے کی تمنا

 

دو بوند ملے ساغر ماَزاع سے ساقی

بس اور نہیں کچھ مجھے پینے کی تمنا

 

قسمت سے ملا آمنہ کا لعل درخشاں

تھی مہرِ رسالت کو نگینے کی تمنا

 

دیکھا کہ ہیں سرکار عرب ساقی کوثر

رِندوں کو ہوئی اور بھی پینے کی تمنا

 

صد پارہ ہوں یوں دامنِ دل ہجرِ نبی میں

ہو بخیہ گرِ وصل کو سینے کی تمنا

 

ہے تشنہ وہن آج لبِ چشمہ رحمت

لائی ہے کہاں کھینچ کے پینے کی تمنا

 

ہم خوب سمجھتے ہیں تمنا تری اختر

مر کر تجھے طیبہ میں ہے جینے کی تمنا

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ