کیاکروں عرض میں جب رب ہے علیم اور خبیر

by admin

کیا کروں عرض میں جب رب ہے علیم اور خبیر

میں تو کر لیتا ہوں دل پر ہی دعائیں تحریر

سننے والا ہے جو دھڑکن کی زباں میں فریاد

میری خواہش کو بنا دیتا ہے میری تقدیر

جب بنانی ہو مری بات زمانے میں کوئی

وہ سُجھا دیتا ہے اعمالِ حسن کی تدبیر

لفظ اَن گھڑ ہی لکھا کرتا ہوں میں تو لیکن

ڈال دیتا ہے وہ لفظوں میں بلا کی تاثیر

جب دعاؤں کے گلابوں کو کھِلا دیکھتا ہوں

خود ہی ہو جاتا ہوں اندازِ تمنا کا اسیر

اب تمنا ہے مرے قلب کو حاصل ہو جائے

کَرَمِ خاص سے قرآنِ مبیں کی تنویر

کاش بن جائے مری عمر مکمل اب تو

حسنِ اعمال کی، سیرت کی زباں میں، تفسیر

ہے یہ اُمید کہ بخشش کے سبب موت کے وقت

میرے اعمال میں باقی نہ رہے کی تقصیر

وہ جو دکھلاتا ہے خود مجھ کو حسیں خواب عزیزؔ

خود ہی دے دیتا ہے خوابوں کو سہانی تعبیر

حمدیہ آہنگ :بدھ: ۲۴؍جمادی الاول ۱۴۳۸ھ مطابق: ۲۲؍فروری ۲۰۱۷ء

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے

Releated

ضیائے کون و مکاں لا الٰہ الا اللہ

بنائے نظمِ جہاں لا الٰہ الا اللہ شفائے دردِ نہاں لا الٰہ الا اللہ سکونِ قلبِ تپاں لا الٰہ الا اللہ نفس نفس میں رواں لا الٰہ الا اللہ رگِ حیات کی جاں لا الٰہ الا اللہ بدستِ احمدِ مرسل بفضلِ ربِّ کریم ملی کلیدِ جناں لا الٰہ الا اللہ دلوں میں جڑ جو پکڑ […]

by admin

لفظ میں تاب نہیں، حرف میں ہمت نہیں ہے

لائقِ حمد، مجھے حمد کی طاقت نہیں ہے ایک آغاز ہے تو، جس کا نہیں ہے آغاز اک نہایت ہے مگر جس کی نہایت نہیں ہے وحشتِ قریۂ دل میں ترے ہونے کا یقیں ایسی جلوت ہے کہ مابعد بھی خلوت نہیں ہے ترا بندہ ہوں، ترے بندے کا مداح بھی ہوں اس سے آگے […]

by admin