یا رب تیرے محبوب کا جلوہ نظر آئے
اس نورِ مجسّم کا سراپا نظر آئے
اے کاش کبھی ایسا ہو کہ خواب میں میرے
ہوں جس کی غلامی میں وہ آقا نظر آئے
تا حشر میری قبر میں ہو جائے اُجالا
مرقد میں جو ان کا رُخِ زیبا نظر آئے
روشن رہیں آنکھیں یہ میری بعد فنا بھی
گر وقتِ نزع وہ شہِ والا نظر آئے
آؤ کہ شمع نعتوں کی ہر سمت جلائیں
ہر گوشۂ ہستی میں اُجالا نظر آئے
جس در کا بنایا ہے گدا مجھ کو الٰہی
اس در پہ کبھی کاش یہ منگتا نظر آئے
کعبہ اے ریاضؔ اس کو بنا لوں گا میں دل کا
گر نقش قدم مجھ کو تمہارا نظر آئے