اے مرے خدا مرے مہرباں مجھے ایسا وصفِ کمال دے

by admin

ترا نام ورد زباں رہے مجھے ایسے سانچے میں ڈھال دے

کروں ہر گھڑی میں تری ثنا مری سانس میں ترا شکر ہو

ترا قرب ہو تری ذات ہو کوئی ایسا لمحہ وصال دے

ترا سنگ ہو یہ امنگ ہو تری بارگہ میں پڑی رہوں

مجھے اپنے رنگ میں رنگ دے مری بے بسی کو زوال دے

رہے قلب میں تری روشنی ترے ذکر کی رہے چاندنی

بسے آنکھ میں جو تری چمک مجھے اپنا جلوہ جمال دے

میں کروں بیاں تری عظمتیں تری رفعتیں تری جلوتیں

میں جو سوچوں تیرے سوا کبھی مرے اُس خیال کو ٹال دے

ملے عشق تیرے حبیب کا مرا جینا مرنا اسی میں ہو

کروں تیرے نام پہ جاں فدا مجھے بھیکِ عشقِ بلال دے

میں فقیر تیرے ہی در کی ہوں ، نہیں کوئی میرا ترے سوا

ترے پاس کوئی کمی نہیں مری خالی جھولی میں ڈال دے

رہے خیر پر مرا خاتمہ ہے یہ قلبِ ناز کی التجا

میں لحد میں تیری ثنا کروں مجھے ایسا بخت کمال دے

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے

Releated

ضیائے کون و مکاں لا الٰہ الا اللہ

بنائے نظمِ جہاں لا الٰہ الا اللہ شفائے دردِ نہاں لا الٰہ الا اللہ سکونِ قلبِ تپاں لا الٰہ الا اللہ نفس نفس میں رواں لا الٰہ الا اللہ رگِ حیات کی جاں لا الٰہ الا اللہ بدستِ احمدِ مرسل بفضلِ ربِّ کریم ملی کلیدِ جناں لا الٰہ الا اللہ دلوں میں جڑ جو پکڑ […]

by admin

لفظ میں تاب نہیں، حرف میں ہمت نہیں ہے

لائقِ حمد، مجھے حمد کی طاقت نہیں ہے ایک آغاز ہے تو، جس کا نہیں ہے آغاز اک نہایت ہے مگر جس کی نہایت نہیں ہے وحشتِ قریۂ دل میں ترے ہونے کا یقیں ایسی جلوت ہے کہ مابعد بھی خلوت نہیں ہے ترا بندہ ہوں، ترے بندے کا مداح بھی ہوں اس سے آگے […]

by admin