کریما آ کہ مر چلیاں میں غم اندر تڑپھ کے
توں نہ آیوں تے آ جانا ایہ دل باہر تڑپھ کے
مِرے ساقی بھلا ہووی نظر دا جام دے دے
کہ تسا ای نہ مر جاوے ترا لشکر تڑپھ کے
قدم آ کے چُما سوہنا میں وی تے موم ہوواں
قدم چُم کے تے ہوندے سی جیویں پتھر تڑپھ کے
نبی دے عشق دے بھانبھڑ مِرے اندر مچوندا
قلندر میرے تے پڑھدا کوئی منتر تڑپھ کے
میں تاں ای تیری اودر وچ تڑپھ کے آہ نئیں کردا
کہ ساون ای نہ بن جاوے ہُنے چیتر تڑپھ کے
جدوں میں نعت لکھاں تے قلم دی نوک چُم کے
قلندر بن کے نچدے نیں مِرے اکھر تڑپھ کے
جدوں کوثر دا توں اعجازؔ نوں اے جام دینا
ترے پیریں اے ڈگ پینا ترے نوکر تڑپھ کے
