اردوئے معلیٰ

Search

شان میرے مصطفیٰ کی روزِ محشر دیکھنا

ساری اُمّت کو وہ دیں گے جامِ کوثر دیکھنا

 

نور کی برسات ہوتی ہے وہاں آٹھوں پہر

گر خدا لے جائے تو طیبہ میں جا کر دیکھنا

 

دیکھتے ہی دل میں گھر کر لیتے ہیں عشاق کے

مسجدِ آقا کے وہ محراب و منبر دیکھنا

 

پھر بُلایا ہے مدینے میں مرے سرکار نے

دیکھنے والو ذرا میرا مقدّر دیکھنا

 

مصطفیٰ کا شہر ہی تو شہرِ پُرانوار ہے

خُلد یاد آجائے گی طیبہ کے منظر دیکھنا

 

اُن کا عاشق جائے گا شہرِ مدینہ بالیقیں

جس کی قسمت میں ہے وہ شہرِ منوّر دیکھنا

 

خواب میں تشریف لے آئیں گے آقا ایک دن

اُن کی یادوں کو ذرا دل میں بسا کر دیکھنا

 

خاکِ طیبہ سے شفا پا جاؤ گے تم بھی ضرور

اے عزیزالدین خاکی آزما کر دیکھنا

 

اپنے خاکیؔ پر ہمیشہ ملتفت رہتے ہیں وہ

کس قدر ہیں میرے آقا بندہ پرور دیکھنا

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ