اردوئے معلیٰ

Search

یہ کائنات بنی میرے مصطفیٰ کے طفیل

کرم یہ خاص ہے محبوبِ کبریا کے طفیل

 

ہر ایک گام فقط تیرگی تھی ظلمت تھی

اُجالا ہوتا گیا شاہِ دو سرا کے طفیل

 

ہر ایک زمانے میں ہر اِک نبی کی اُمّت کو

ملی ہیں نعمتیں سردارِ انبیا کے طفیل

 

نہ کوئی حُسنِ عمل ہے نہ زادِ راہِ حرم

میں خوش نصیب ہوا آپ کی ثنا کے طفیل

 

ہر ایک دست و گریباں تھا آپ سے پہلے

ہوا ہے امن دو عالم میں مصطفیٰ کے طفیل

 

درود پڑھ کے ہوا کے سُپرد کردوں گا

درود طیبہ پہنچ جائے گا ہوا کے طفیل

 

یہ صبح شام کی رفتار اور یہ شمس و قمر

رواں ہیں آپ کے الطاف ِ بے بہا کے طفیل

 

خدا نے نعمتِ عظمیٰ ہمیں عطا کردی

حضور ہم کو ملے بی بی آمنہ کے طفیل

 

ہم اپنے بخت پہ نازاں ہیں اس لیے خاکیؔ

بہشت پائیں گے محبوبِ کبریا کے طفیل

یہ نگارش اپنے دوست احباب سے شریک کیجیے
لُطفِ سُخن کچھ اس سے زیادہ